Patay ang mag-asawa nga miyembro sang New People’s Army sa nagluntad nga engkwentro batok sa mga suldado sa Sitio Kulihaw, Barangay Buenavista, ciudad sang Himamaylan, Negros Occidental kahapon sang hapon.
Suno kay Brigadier Gen. Inocencio Pasaporte, commander sang 303rd Infantry Brigade, nakabaton sang impormasyon ang 94th kag 79th Infantry Battalion nga may presensya sang rebelde nga grupo sa lugar.
Sa tion sang validation, nasugata sang mga suldado ang indi magnubo 15 ka rebelde alas-3:30 sang hapon.
Matapos ang 15 minutos nga pagbayluhanay sang lupok, napatay ang lider sang grupo kag ginbilin lang sang kaupdanan ang iya bangkay sa Sitio Alolong, Barangay Buenavista.
Siya ang ginkilala kay Elbert Quilano alyas Ka Carding nga lider sang SDG Platoon sang Central Negros II.
Kaupod sini nga napatay ang iya misis nga si Jessa Quilano nga medical officer sang SDG Platoon sang Komiteng Rehiyon Cebu-Negros-Bohol.
Suno kay Pasaporte, wala nasarangan sang mga hangaway sang platoon nga dal-on ang bangkay nanday Quilano gani ginbilin nalang ini sa Sitio Alolong.
Nakuha sa encounter site ang duha ka caliber .45 pistol nga may mga bala, cellphones, radyo kay subersibo nga mga dokyumento kag personal nga kagamitan.
Wala naman sang napilasan sa tropa sang militar.
Santo sa intelligence monitoring, ang naengkwentro nga rebelde sa Barangay Buenavista ang kaupod man sang grupo nga naengkwentro sang 94th IB sa Barangay Carabalan sang Marso 25.
Ginalauman naman nga makuha sang pamilya ang bangkay sang duha ka NPA members.
Suno kay Pasaporte, ang operasyon ang kabahin sang security preparations agud masiguro ang kalinong kag katawhay sa eleksyon sa Mayo 9.
