Pabor ang Presidente sang Liga ng Barangay Negros Occidental Chapter nga i-extend ang termino sang Barangay and Sangguniang Kabataan (SK) officials sa apat tubtob lima ka tuig.
Madumduman nga ginaduso ni Senator Francis “Chiz” Escudero ang postponement sang BSKE kag pag-extend sang termino sang mga opisyal sang barangay kag SK gikan tatlo tubtob lima ka tuig nga patigayunon sa una nga Lunes sang Nobyembre 2028.
Sa interview sang Bombo Radyo kay Richard Julius Sablan, Presidente sang Liga ng Barangay Negros Occidental Chapter, ginpahayag sini nga bintaha para sa mga opisyal sang Brgy nga madungagan ang termino bangud ma-implementar kun ano ang plano kag makita man ang mga proyekto.
Suno kay Sablan, kulang ang 3-year term bangud indi matapos sang isa ka punong brgy ang luyag nila nga himuon sa ila nasakupan sa sulod lamang sang tatlo ka tuig nga pagdumala.
Apang sa apat ukon lima ka tuig, pahayag ni Sablan, wala na sang lusot pa bangud makita gid kun ano ang hinumoan sang isa ka punong brgy ukon opisyal.
Sa pihak sini, ginpahayag ni Sablan nga wala sang problema kun madayon ukon indi ang BSKE sa Nobyembre 2 bangud kun naga perform man lang sang maayu ang isa ka opisyal, makita man ini sang mga pumuluyo kag botohon sa gihapon.
