Ginhampangan nga lighter sang duha ka kabataan ang gintunaan sang sunog nga nagtupok sa isa ka balay sa Purok Paho, Barangay Taculing, Bacolod City kahapon ala- 1:06 sang hapon.
Ang balay ang duha ka panalgan kag semi concrete apang nagapangibabaw ang light materials.
Ang balay ginapanag-iyahan ni Cecilia Mahilum kag nagarenta diri sanday Jonna Mae Espares kag Freddie Mahilum.
Sang nag-umpisa ang sunog yara sa libertad market si Freddie Mahilum kag nabilin naman sa ila nga balay ang nagabusong sini nga asawa kag tatlo ka kabataan nga naga-edad singko anyos, tres anyos kag isa ka tuig nga bata.
Yara sa gwa ang asawa sang nag-umpisa ang sunog sa ila kwarto.
Gilayon naman sini nga ginkuha ang kabataan.
Ang sunog ang nag-umpisa ala-1:06 sang hapon kag napatay ala- 1:24 sang hapon.
Bangod sa kalayo, naubos gid ang mga pagkabutang sang pamilya, magluwas lamang sa mga nakahalay nila nga mga panapton sa gwa sang puluy-an.
Sa interview sang Bombo Radyo kay Senior Fire Officer 4 Archie Espanio, Investigation and Intelligence Unit Chief- Bureau of Fire Protection-Bacolod, sa ila imbestigasyon indi mahambal nga naggikan sa kuryente ang sunog bangod isa na ka bulan nga na-utdan sang kuryente ang balay.
Suno diri, ila nanotisyar ang trauma sa lima ka tuig nga bata kag ila ini ginpakalma kag ginkwestyon kag amo nga nahibaluan nga paghampang sang lighter ang gintunaan sang sunog.
Naghampang ang mag-utod nga lima kag tatlo ka tuig sang lighter kun sa diin ginsindihan sang magulang ang short sang ila amay kag kurtina sang ila balay.
Madasig nga naglapta ang sunog kag wala na nahimo nga mapalong sang mga pumuluyo sa palibot ang kalayo bangod dako na ini sang makit-an.
Nagdangat sa P90,000 ang balor sang damage sa nagluntad nga sunog.
