Nangin malinong kag matawhay ang Lights On Ceremony kag Christmas Festival of Lights kagab-i sa ciudad sang Bacolod.
Sa interview sang Bombo Radyo Bacolod kay Police Major Elmer Bonilla, station commander sang Bacolod City Police Station 4, ang Christmas Festival of Lights sang STI- West Negros University ang tuigan nga ginapatigayon kag ini ang gindungan na lamang sa Lights On Ceremony sang Bacolod City Government.
Ang nasambit nga aktibidad ang gintambungan sang kapin 10,000 ka mga tumalan-aw apang suno sa administrators sang mga nakigbahin nga eskwelahan ang kapin 14 mil.
Suno kay Bonilla, nangin matawhay man ang pagpatigayon sang aktibidad apang nag-ulan nga nagtulod man sa kapin katunga sang mga tumalan-aw nga mga kalabanan mga estudyante sang magkatuhay nga buluthuan sa ciudad ang magpauli.
Bisan may delay ang mga salakyan indi man tuman ang trapiko bangud may yara man sang mga diversion roads nga maagyan ang mga salakyan kag makalikaw sa area sang Bacolod Government Center nga ginapatigayunan sang activities.
May gin-augment man nga mga kapulisan nagikan sa iban nga police units agud nga magbantay kag magseguro sang seguridad sang mga tumalan-aw.
