Gin-athag ni Isabela Municipal Councilor Raymund Montilla nga wala nila ginlauman ang pagdugok sang mga tawo sa ginpatigayon nga lights on kagab-i sa plaza sang banwa.
Suno kay Councilor Montilla, ang plano sang banwa amo ang virtual lang nga lights on apang madamo sang nagkadto nga mga pumuluyo bangud nagviral sa social media ang pagahemuon nga aktibidad.
Suno diri natabuan man nga bag-o natapos ang mga ginpangrenovate sa plaza kag sa park kag natabuan man nga madamo man sang mga locally stranded individuals kag Overseas Filipino Workers nga nagpauli sa ila banwa kag luyag nga maglagaw.
Gin-athag man sini nga pagkatapos sang countdown para sa lights on, wala na gindayon ang programa para sa mga pamatan-on agud nga makaamat amat na pauli ang mga tawo.
Isa pa ka rason kun nga a nagdamo ang tawo bangud ang plaza ang yara sa sentro sang banwa kag walking distance lang sa mga tawo ksg kabarangayan sa town proper.
Nalipay man ini nga nagsuksok sang facemask ang mga tawo nga nagtambong sa lights on apisar nga nagdugok ini.
Nagumpisa ang lights on alas 06:00 ang takna sa gab-i tubtob alas 07:00 sa gab-i kahapon.
Nanugunan man ini bangud wala nadayon ang programa apang ginaplano sang Isabela City LGU sa pagpanguna ni Isabela Municipal Mayor Irene Montilla nga padulungan nalamang nila ang mga far flung barangays agud maghatag sang basic necessities nga kinahanglanon sang mga tawo kaangay lamang sang basin, hose para sa tubig kag mapatigayon man sila sang medical check up, kag panghatag sang bulong.
Samtang sa sektor naman sang agrikultura nagahatag ang banwa sang seedlings, fertilizers kag mga farm equipments.
Zero cases naman sa Covid-19 ang banwa sang Isabela kag wala man sila sang fatalities bangud sa balatian.
Nagpangayo man pasaylo si Montilla sa natabo nga pagdugok sang tawo bangud wala man nila ini na antisipar kag nagpasalamat man ini nga nangin successful ang pagpatigayon sang lights on.
Ginpasiguro man sini sa mga taga Isabela nga tanan sila sa LGU sa pagpanguna ni Mayor Irene Montilla ang ginahimo ang tanan agud nga maimprove ang banwa kag ginalauman man sini nga sa palaabuton nga tinuig may yara sang bag-o nga infrastructures ang banwa.
