Ginkumpirmar sang station commander sa Bacolod Police Station 7 nga drug den ang likod sang balay ni Aurelio Rull, ang senior citizen nga tanod nga ginsulod kag ginpatay sa iya puluy-an kaina sang kaagahon sa Block 68, Zone 3, Kalantas, Barangay Vista Alegre, Bacolod City, samtang may narecover man nga mga empty sachet sang suspected shabu sa sulod sang iya balay.
Suno kay P/Capt. Elmer Bonilla, santo sa inisyal nga imbestigasyon sang mga kapulisan kag sang SOCO, alas-3:30 kaina sang ginsulod ang balay sang 73 anyos nga tanod.
Si Rull ang nakaangkon sang madamo nga pilas tuga sang pagpamuno samtang naga-ungot pa sa tangkugo sini ang plamengko nga kapin isa ka tapak ang kalabaon sang ini ang masapwan, samtang ginhingagaw naman dala sa ospital ang siyam ka tuig nga lalaki nga bata nga adaptibo sang biktima nga nakaangkon man sang patal nga mga pilas sa ulo bangod sa pagpamuno.
Pahayag ni Bonilla nga magapangita pa sila sang witness kag nagalaom nga may magatuad.
Samtang nakabatun man ini sang impormasyon nga may nakontra ang biktima antes paman ang insidente.
Ang suspetsado ang ginapatihan nga nag-agi sa likod sang balay agud makapalagyo kun sa diin ginpalos sini ang jalousie sang bintana.
Nakita man nga may footprint sa likod sang balay.
Ginkumpirmar man sang station commander nga may plastaran ukon drug den sa likod sang balay sang biktima kun sa diin madamo man sang nakita nga nagalapta nga empty sachet sang suspected shabu kasubong man sa sulod mismo sang iya balay.
Samtang sa pihak nga bahin, nagapahayag naman ang pila ka mga residente sa lugar nga nalakip sa drugs watchlist sang barangay ang biktima.
Santo sa mga ini, makapila na ginpaidalum sa drug buybust operation ang balay bangod ini ang ginagamit nga drug den sang mga nagagamit sang iligal nga droga.
Ini ang nagakompormi naman sa pahayag sang kaingod balay sang biktima nga may kaangay nga adikun nga nagpadulong sa balay ni Rull kag nagtugyan diri nga magscore, apang nagpamalibad naman diri ang biktima.
