Ginkanselar sang grupo sang traditional jeepney drivers and operators ang plano nga lima ka adlaw nga Untat-Byahe sa Bacolod City sa Pebrero 17 tubtob 21.
Sa interview sang Bombo Radyo Bacolod kay Rudy Catedral, presidente sang Bacolod Alliance of Commuters, Operators and Drivers (BACOD) – Manibela, una na nga nagpagwa sang pronouncement sanday Bacolod Traffic Authority Office Head Patrick Leonard Lacson kag Councilor Al Victor Espino, chairperson sang committee on Transportation sa Sangguniang Panlungsod nga iflagdown ang mga wala sang Mayor’s permit sa pagtakop sang One Stop Shop sa Pebrero 16.
Apang paathag sini nga antes makakuha sang Mayor’s permit, requirement ang prangkisa kag rehistro nga wala ginahatag sa ila.
Bangod sini sila ang nag-ayo ng indi anay ulamiron ang traditional jeepneys bangod komplikado pa ang problema sang transportation sector.
Paathag ni Catedral nga indi lamang sila ang apektado kasubong man ang mga pumuluyo nga nagasalig sa mas barato nga plete sa kada adlaw.
Suno diri, P65,000 ang ila bayaran hinali nga madakpan.
Dugang pa sini nga nagadangat sa isa ka libo ang mga traditional jeepney nga maga-untat sa pagbyahe kun madayun ang mando samtang kulang naman ang numero sang modernized jeepneys.
Suno diri may ginahitso na nga resolusyon sa Sangguniang Panlungsod nga ginabantayan nila nga ipagwa, nga magahatag sa ila sang moratorium.
Napamatud-an ni Catedral nga ini ang sarang mahimo bangod napatuman naman ini sang Nobyembre tubtob Disyembre 2022.
Suno diri, humalin sang nagpungko si Bacolod City Mayor Alfredo “Albee” Benitez, wala na nakarelease sang prangkisa kag business permit sa mga traditional jeepneys.
Panawagan sini nga sila ang pahanugutan nga makarenew sang prangkisa kag handa ini bisan magmulta basta makadalagan lamang ang mga units sang legal.
Nagapati ini nga ang Land Transportation Franchising and Regulatory Board Region 6 Director lamang ang nagapakatig-a kag nagahatag sang sala nga datos sa LTFRB Central Office.
