Arestado ang lima ka mga persona sa drug buybust operation nga ginpatigayon sang Philippine Drug Enforcement Agency – Negros Occidental sa Barangay 2, Bacolod City kahapon.
Sa interview sang Bombo Radyo kay PDEA Negros Occidental head Nicholas Gomez, makapila na ka beses nga nangin subject sa Isumbong Mo kay Wilkins nga programa si Jun Monido Jr., 42 anyos, drug den maintainer kag residente sang Purok Sigay, Barangay 2, Bacolod City.
Suno kay Gomez, matapos ang ila validation, positibo gid man nga naga-engage sa illegal nga buluhaton si Monido gani ila ini ginpatigayunan sang operasyon.
Naaresto man sa lugar ang apat ka iban pa nga ginkilala sanday Enrique Esio Cantalao, 48 anyos; Arnulfo Filoteo Jr., 29 anyos, lunsay mga residente sang Purok Binuligay, Barangay Bata; Kermit Aldober, 36 anyos, residente sang Barangay Singcang Airport; kag Reynald Binarao, 36 anyos, residente sang Barangay Bata, Bacolod City.
Nakuha sa ila paghinakop ang siyam ka sachet sang suspected shabu, P500 bill kag mga drug paraphernalia.
Ang nakumpiskar nga illegal nga druga ang ginabanta nagabug-at sang 15 ka gramos kag may estimated market value nga P102,000.
Sa karun yara ang mga ini sa kustodiya sang PDEA kag natalana nga magpangatubang sang kaso nga paglapas sa R.A. 9165 ukon Comprehensive Dangerous Drugs Act of 2002.
