Lima ka ash emission ang narekord nga ginbuga sang bulkan Kanlaon humalin kaina sang kaagahon tubtob sang udto.
Sa interview sang Bombo Radyo kay Ptolemy Mañego, research asisstant sa Philippine Institute of Volcanology and Seismology (PHIVOLCS) Kanlaon Volcano Observatory – La Carlota Station, una nga may narekord nga pagbuga sang abo alas- 5:29 kaina sang kaagahon, nga ginsundan sang alas- 7:20 sang aga, alas- 8:05 sang aga, alas- 10:14 sang aga kag alas- 10:48 sang aga.
Suno diri, ang may pinakamataas nga narekord nga ash emission amo ang alas- 10:48 kun sa diin nagdangat sa 900 meters ang kaatason padulong sa nabagatnan-nakatungdan nga dereksyon.
May narekord man nga ashfall sa pila ka mga area sa banwa sang La Castellana kag ciudad sang La Carlota apang light ashfall lamang.
Narekord man ang masobra sa napulo ka volcanic earthquakes humalin alas- 12:00 sang kaagahon tubtob kaina sang udto.
Ginpaandaman ang tanan sa gulpyada nga paglupok sang bulkan, pagluntad sang lava flow, ashfall, Pyroclastic Density Current, rockfall kag lahar flow sa tion sang pag-inulan.
