Lima ka mga classrooms sa Bago City Elementary School ang nasunog kahapon sang hapon, Marso 21.
Sa interview sang Bombo Radyo Bacolod kay Edilberto Marañon, manunudlo sa Bago City Elementary School, antes nagluntad ang sunog yara ang mga ini malapit sa principals office kag nakapanimaho ang mga ini sang daw kaangay nagakasunog nga kuryente.
Suno kay Marañon, sang maliko na sila sa bahin sang Grade 4 classrooms may nakita sila nga daw gaaso kag kadasig lang nga nagdamol ang puti nga aso kag nangin itom na kun sa diin may isa ka tawo nga nagsinggingit nga may sunog.
Ang lima ka classrooms ang ginaklasehan sang Grade 2, 3, 4 kag isa ang stock room.
Pila sa nalakip sa na sunog ang laptops, printers kag mga school forms.
Suno kay Marañon, natabuan man nga wala sang mga estudyante sang nasunog ang lima ka classrooms bangud wala ang mga ini ginpabalik kahapon kag wala man sa nasambit nga classrooms ang mga manunudlo.
Wala man sang bisan ano nga gamit nga nasalbar bangud madasig man nga nagdako ang kalayo sa nagluntad nga sunog.
