Ginkompirmar sang bise alkalde sa ciudad sang Bacolod nga nagnegatibo sa COVID-19 sa ikaduha nga RT-PCR test ang lima ka mga pasyente sang ciudad.
Sa interview sang Bombo Radyo Bacolod kay Vice Mayor El Cid Familiaran, chairman sang Inter-Agency Task Force against coronavirus sa ciudad, ginpahayag sini nga nakarecover na kanday Bacolod Patient No. 14, ang 36 anyos nga babayi kag residente sang Brgy. Taculing; Bacolod Patient No. 17, 37 anyos nga isa ka repatriated OFW kag residente sang Brgy. Estefania; Bacolod Patient No. 18, 32 anyos nga lalaki kag residente sang Brgy. Bata; Bacolod Patient No. 19, 35 anyos nga lalaki kag isa ka locally stranded individual nga nagikan sa Manila kag residente sang Brgy. Alijis; kag Bacolod Patient No. 20, 38-anyos nga lalaki kag isa ka repatriated OFW kag residente sang Brgy. Sum-ag.
Suno kay Familiaran mas madasig na karon nga naga-abot ang mga swab test result sang mga ginkuhaan sang swab samples nga mga LSI’s kag repatriated OFWs.
Dugang pa sini bangud sa nagadinamo nga mga naga-alalabot nga mga LSI, ang tanan nga nagnegatibo na ang resulta nga wala pa nakatapos sa 14-day mandatory quarantine ang ginaturn-over sa mga barangay agud didto nalang tapuson ang mga nabilin nga inadlaw sang quarantine period.
Ginabutangan naman sang tarpaulin ang mga balay sang mga ini bilang pahibalo sa mga pumuluyo nga nagapaidalom pa sa home quarantine ang tagbalay kag indi man ang mga ini makagwa bangud magluwas sa nagabantay nga BHERTS, alerto man ang mga kasilingan sini.
Nagpanugyan man si Familiaran sa mga pumuluyo nga maghalong gihapon bangud nagapadayon pa kita sa pagpangatubang sa health crisis kag mangin responsable agud indi malatnan sang balatian apisar nga nangin mahalog na ang restrictions nga ginapatuman sang syudad.
Samtang, nagpaninundugan ini nga valid government ID lang ang kinahanglan agud nga magtabok sa Iloilo City kag vice versa.
Apang suno diri mas manami man ang ginhimo sang provincial government nga pagkuha sang mga swabs sang pasahero nga nag-alalabot sa Bredco port kahapon kalakip na ang mga residente sang Bacolod santo sa luyag ni anay Congressman Albee Benitez kun sa diin igashoulder man sini ang swab fee tubtob Hunyo 30.
