Ginpahayag ni President Ferdinand Marcos Jr. ang dako nga benepisyo sa sektor sang turismo kag ekonomiya nga madul-ong sang lima ka infrastructure projects nga ginpirmahan sa isa ka seremonya sa Malacañang subong nga adlaw.
Ini nga mga proyekto nga sa idalom tanan sang Department of Transportation amo ang construction sang New Cebu International Container Port (NCICP), expression of interest para sa Cebu Bus Rapid Transit (CBRT) system, public-private partnership agreement para sa modernisasyon sang Bohol-Panglao International Airport (BPIA), kag bag-o nga Dumaguete and Siargao airports.
Suno kay Marcos, sa tion nga makompleto, ini nga mga proyekto ang makahatag sang linibo nga mga trabaho kag kahigayunan sa pagnegosyo kag pang-ekonomiya nga aktibidad.
Dugang niya, ang Bohol-Panglao International Airport modernization ang makadugang sang airport capacity halin sa 2 million pasaka sa 2.5 million kada tuig pag-abot sang 2026 kag sa 2030, ginapanan-aw nga makaserbisyo ini sang kapin 3.9 million nga mga pasahero.
Sa bahin sang bag-o nga Dumaguete kag Siargao regional airports, ini makabukas sang mas madamo nga oportunidad para sa mga estudyante, workers, kag negosyo.
