Lima ka buluthuan ang nagkansela sang klase kasunod sa nagluntad nga engkwentro sa tunga sang 47th kag 15th Infantry Battalion sang Philippine Army batok sa kapin 12 ka mga gina-alegar nga katapo sang New People’s Army (NPA) sa Barangay Gatuslao, Candoni, Negros Occidental, alas- 3:40 kahapon sang kaagahon.
Sa interview sang Bombo Radyo kay Punong Barangay Randy Dollosa Sr, lima ka pamilya ukon napulo ka mga indibidwal ang apektado sa nagluntad nga engkwentro.
Suno diri, wala sang may gindala sa evacuation center bangod nagtinir na lamang ang mga affected families sa ila nga mga pamilya nga malayo sa lugar.
Ginkansela man ang klase sa apat ka elementary school kag isa ka high school agud nga masecure ang safety sang mga estudyante.
Ginahulat pa sa karun ang derektiba kun hilway na nga mabalik ang klase kag makapauli ang mga residente.
