Nadischarge na sa ospital ang pito sa 22 ka mga estudyante sang Bacolod City College ang nalipungan matapos nakahaklo sang aso nagikan sa color smoke nga ila gingamit bilang props sa practical exam sang mga ini sang Mayo 29.
Sa interview sang Bombo Radyo kay Dr. Ma. Johanna Bayoneta, college administrator sang BCC, sa 20 ka mga estudyante kag duha ka Public Order and Safety Office (POSO) guards nga nalipungan sang Lunes, pito ang gindala sa ospital samtang ang iban pa ang ginfirst-aid lamang sa ambulansya.
Ang pito ang ginalakipan sang lima ka mga estudyante kag duha ka POSO guards.
Suno kay Bayoneta, padayon nga ginamonitor ang mga estudyante kay may yara man sang monitoring ang Emergency Operations Center kasubong man ang clinic sang ila buluthuan.
Nagpangayo man ang BCC sang vitams agud ihatag sa mga estudyante bangud isa ini sa mga rekomendasyon sang sila ang narelease na sa ospital.
Suno diri, may special meeting for assessment kun ano ang action plan nga himuon para sa seguridad sang mga estudyante.
Suno sa iya, ginpresentar sa meeting kun ano ang himuon sang ciudad agud mapasanyog pa ang institutional safety program.
Sa karun wala pa nakapagwa ang official laboratory ukon x-ray sang mga estudyante
Samtang wala pa nadeterminar kun ano nga chemicals ang unod sang color smoke apang suno kay Acting Mayor kag Vice Mayor El Cid Familiaran, tuman kaathag sa instructions pagbakal sang mga estudyante online nga sa outdoors lamang ini dapat gamiton.
Suno kay Familiaran, isa sa mga rekomendasyon amu nga tsekyaron ang gamit sang mga estudyante sa pagsulod sa eskwelahan agud malikawan ang pagluntad sang untoward incidents.
Suno sa iya, pagadiskusyunan sang school authorities kaupod si Councilor Al Victor Espino, chairman sang Committee on Education kun ano ang mga measures nga igapatuman.
Suno diri, kun kinahanglan sang legislative action para diri, ila ini pagahimuon.
Dugang pa sang bise-alkalde nga ang BCC ang ginapanag-iyahan sang Bacolod City Government gani dapat nga i-address ang problema kag dapat may interventions agud indi na ini masulit liwat.
