Ginpasalig sang caretaker sang Bureau of Fire Protection (BFP) Region 6 nga indi maapektuhan ang ila serbisyo kasunod sang kontrobersiya may kaangtanan sa ginaalegar violation sa quarantine protocol.
Madumduman nga santo sa Bureau Order No. REA-2020-098 nga ginpirmahan ni Fire Director Jose Embang Jr. kag napetsahan Hunyo 17, 2020, naghingyo sang relief si Fire Senior Supt. Roderick Aguto matapos nga maangot ang iya pangalan sa kontrobersiya sa isa ka COVID positive nga personnel nga gin-alegar nagbayolar sang quarantine protocols.
Ginbutang bilang caretaker sang BFP-6 si Fire Senior Supt. Jerry Candido.
Sa interview sang Bombo Radyo Bacolod kay Candido, ginpahayag sini nga siya anay ang ginbutang nga caretaker samtang wala pa sang opisyal nga mando ang Department of the Interior and Local Government (DILG).
Suno diri, i-assign naman sa opisina sang BFP chief si Aguto.
Samtang, ginkumpirmar man sini nga naka-isolate karon sa Bago City quarantine center ang lima ka mga fire marshal sa probinsya nga ginalakipan sang Bacolod, Silay, Cadiz, Bago kag San Carlos matapos ang mga ini nag-upod sa Boracay kag naka-closed contact sa BFP personnel nga nagpositibo.
Suno kay Candido, napaidalom na sa rapid test ang 196 tanan ka mga nacontact trace kag padayon nga gina-quarantine sa karon.
Natalana naman nga ipaidalom sa RT-PCR testing ang mga ini subong nga adlaw lakip na ang lima ka mga fire marshal nagikan sa Negros Occidental.
