Isa pa lang nagikan sa anom ka ginaalegar miyembro sang New People’s Army nga napatay sa ginapahayag engkwentro batok sa mga suldado sa Purok Lubi, Barangay Tabugon, Kabankalan City sang Huwebes sang gab-i ang naclaim sang ila nga pamilya.
Suno kay Lt. Col. J-Jay Javines, pinuno sang Public Affairs Office sang 3rd Infantry Division, naclaim na ang bangkay sang driver sang tricycle nga si Ruben Gaitan samtang wala pa sang pamilya sang lima ka iban pa nga nagpadulong sa punerarya.
Suno kay Javines, padayon pa ang paghibalo kun taga-diin ang lima ka mga ginaalegar rebelde agud nga mapahibalo ang ila pamilya kag maclaim ang ila bangkay.
May yara man sang close coordination ang militar sa Kabankalan City government agud maistoryahan kun ano ang mabulig sang ciudad sa pagpalubong sa mga bangkay nga indi maclaim.
Suno kay Javines, pila pa ka adlaw ang hulaton kag kun wala gid sang may maclaim, hatagan man sang desente nga lubong ang mga rebelde paagi sa pagpatigayon sang misa.
Ginahingyo naman ang suporta sang LGU para sa ila nga lungon kag lulubngan.
Sa karon, napatigayon na sang PNP Scene of the Crime Operation ang post-portem examination sa lima ka mga bangkay.
Sa ulihi nga pagsapol sang Regional Joint Security Coordinating Center, wala nalakip ang Barangay Tabugon sa ginpagwa nga listahan sang election areas of concern may kaangtanan sa nagahilapit nga Barangay kag Sangguniang Kabataan elections.
Sa kabug-usan, may yara sang 178 ka election areas of concern sa rehiyon kag tatlo nga yara sa red category ang nahamtang sa Negros Occidental.
Suno diri, nakalabay lang ang armado nga grupo sa Kabankalan kag natabuan nga nakabaton sang report ang militar angot sa ila presensya gani nagsugat-anay ang mga ini sa Purok Lubi, Barangay Tabugon.
Liwat naman nga nagpanawagan ang militar sa hanay sang rebelde nga grupo nga magbalik na sa sabak sang gobyerno.
