BACOLOD CITY-Lima ka gina-alegar katapo sang New People’s Army ang patay sa engkwentro batok sa militar kag kapulisan sa Mabinay, Negros Oriental kaina sang kaagahon.
Suno sa 11th Infantry Batallion sang Philippine Army, alas 12:45 sang kaagahon sang nagluntad ang engkwentro sa Sitio Talingting, Brgy. Luyang, Mabinay, Negros Oriental.
Una diri, nakabaton sang report ang tropa sang gobyerno nagikan sa mga barangay officials kag mga residente nga may armado nga kalalakin-an nga nagatinir sa duha ka balay nga yara sa Sitio Talingting.
Samtang nagapalapit ang 11th IB, 94th IB, Regional Mobile Force Batallion 7 kag Mabinay PNP dala ang search warrant nga gin-isyu ni Judge Rosario Cariaga sang Bais City, una nga nagpalupok ang mga suspetsado gani gilayon man nga nagbalos ang pwersa sang gobyerno.
Nagdugay sang 30 minutos ang pagbayluhanay sang lupok nga gintunaan sang kamatayon sang lima ka katapo sang NPA.
Ginkumpirmar naman ni Major Cenon Pancito III, spokesperson sa 3rd Infantry Spearhead Division sang Philippine Army, nga kaupod sa mga nagtaliwan amo ang subject sa warrant of arrest nga si Isaias Villamor Ravilista Sr.
Si Ravilista ang gina-alegar kaupod sa mga suspetsado sa pagpatay sa apat ka mga kapulisan sa Barangay Bato, Ayungon, Negros Oriental sadtong Hulyo 18, 2019.
Ginpasakaan ini sang kaso kaangot sa Section 28 sang Republic Act 10591 ukon Comprehensive Law on Firearms and Ammunitions Regulation.
Narecover sa lugar ang tatlo ka M16 rifles, isa ka AK47 rifle, isa ka kalibre 45 nga pusil, apat ka rifle grenades, isa ka improvised explosive device, mga magazine kag mga bala sang nanari-sari nga mga armas kag mga subersibo nga mga dokumento nga may high intelligence value.
Sa karun, padayun pa nga ginakilala ang iban pa nga mga nagtaliwan.
