Ginkumpirmar sang pinuno sang inter-agency task force against COVID-19 sa ciudad sang Bacolod nga magluwas sa Transcom Bacolod, may lima pa gid ka mga business process outsourcing (BPO) companies sa ciudad nga ginpadal-an sang notice of violation matapos mapaslawan nga magpatuman sang COVID-19 Contact Tracing System Ordinance.
Nahibaluan nga ang BacTrac Contact Tracing System ang isa ka web-based kag mobile-based app nga gindevelop para mas mahapos kag madasig nga contact tracing sang mga COVID positive patients sa ciudad.
Sa interview sang Bombo Radyo Bacolod kay Vice Mayor El Cid Familiaran, ginpahayag sini nga ang lima pa gid ka mga BPO companies ang rehistrado sa Bactrac system apang wala nila ginagamit sa ila nga empleyado.
Suno kay Familiaran, nagpadala sila sang notice of violation sa lima ka mga kompaniya bangud napaslawan sila nga ipatuman ang ordinansa.
Nahibaluan nga sa idalom sang amo nga city ordinance, may penalidad nga P1,000, P2,500 kag P5,000 kag pagkapriso nga indi magnubo sa anom ka bulan para sa first, second, third kag succeeding offenses nga nagahulat sa mga establisyemento kag government offices nga wala naga-comply.
Dugang pa sang bise alkalde nga magaresulta sa pagpasirado sa establisyemento kun masulit pa gid ang bayolasyon pagkatapos sang 3rd warning.
Suno kay Familiaran, posible nga magpatigayon sang surveillance testing sa iban pa nga mga BPO companies kun may yara sang makita nga pag-spike sang kaso sang coronavirus kaangay sa ginhimo sa Transcom Bacolod kun sa diin kabug-usan nga 41 ka mga empleyado ang nagpositibo sa balatian.
