Padayon sa karon ang manhunt operation sang Bureau of Jail Management and Penology kag Philippine National Police sa lima ka mga priso nga nagpalagyo sa Negros Occidental District Jail sa Barangay Tabunan, Bago City kaina sang kaagahon.
Suno kay Jail Chief Inspector Jairus Anthony Dogelio, tagpamaba sang Bureau of Jail Management and Penology (BJMP) Region 6, ginabanta nga ala-1:20 tubtub alas-2:00 sang kaagahon nagpalagyo ang mga inmates kag nadiskubre sang mga jailguards sang sila ang naglibot.
Gin-utod sang mga pugante ang kabilya sa bintana sang selda kag nagtaklas sa pader paagi sa ginsugpon-sugpon nga habol.
Kalakip sa mga nagpalagyo si Francisco Epogon, 30-anyos, residente sang Sitio Manluy-a, Barangay San Jose, Sipalay City, Negros Occidental nga nagapangatubang sang kaso nga robbery with violence against or intimidation of persons.
Si Epogon ang nadakpan sa Barangay Isio, Cauayan, Negros Occidental nagligad nga June 21, 2020 matapos ginserbehan sang warrant of arrest kun sa diin nakuhaan pa ini sang hand grenade sa iya nga backpack.
Siya ang ginatudlo nga lider sang Epogon robbery group nga nagapangsulod sa balay sa Negros Occidental pati na sa Bacolod.
Kaupod ni Epogon sa pagpalagyo sanday Marvin Celeste sang Sitio Tima, Brgy. Gawahon, Victorias City nga may kaso nga paglapas sa RA 10591 ukon Comprehensive Law on Firearms and Ammunitions Regulation; kag Alejandro Montoya sang Brgy. Tisol, Victorias City nga may kaso nga carnapping, robbery, violation sang RA 10591, attempted homicide kag acts of lasciviousness.
Nag-upod man sa tatlo sanday Daniel Tamon sang Brgy. Kumaliskis, Salvador Benedicto nga may kaso nga murder; kag si Danilo Celeste sang Victorias City nga napriso sa kaso nga carnapping, robbery, Violation of Section 28 RA 10591 kag attempted homicide.
Suno kay Dogelio, indi klaro ang kuha sang CCTV camera sa nagpalagyo nga mga PDL bangud malayo ang lugar sa nahamtangan sang CCTV.
