Wala pa nakagwa sa ospital ang lima ka lalaki kag duha ka babayi nga napilasan matapos nahulog ang ginasakyan nila nga Isuzu Forward Truck sa pil-as sa Purok Talus, Barangay Pandanon, banwa sang Salvador Benedicto, Negros Occidental kahapon.
Sa interview sang Bombo Radyo kay Police Major Eugene Tolentino, hepe sang Salvador Benedicto Municipal Police Station, stable na ang kondisyon sang apat samtang kritikal ang kondisyon sang iban sa ila.
Ang mga biktima ang gindala sa Corazon Locsin Montelibano Memorial Regional Hospital.
Nakabisita naman sa police station ang mga kaupod sang mga biktima nga nagasakay sa lain nga truck nga naglabay sa Kabankalan City kag magakitaay kuntani sila sa Negros Oriental.
Nabalik naman ang personal belongings sang mga biktima bangud may cash pa diri.
Wala naman narecover ang cellphone sang pila ka biktima, samtang may nagabantay naman sa ginhulugan sang truck agud mabantayan ang karga nila nga bombay.
Ang truck ang nagikan sa ciudad sang Bacolod kag padulong sa Negros Oriental kag may karga nga pito ka tonelada sang bombay.
Pag-abot sini sa nasambit nga lugar, nadulaan ini sang preno rason nga nag-overshoot ini sa pil-as nga may kataason nga kapin 20 tubtob 25 metros.
Ang mga biktima ang ginkilala nga sanday Robwell Barientos, 44 anyos, kasado; Diego Trinidad, 20 anyos, single; Marilyn Cosme, 52 anyos, kasado, Mark Anthony Trinidad, 23 anyos, single, Junjun Cruz, 23 anyos kag lunsay mga residente sang Occidental Mindoro samtang ang duha naman nga sanday Third Moncatar, kag Sabar Moncatar, ang lunsay mga residente sang syudad sang Bacolod.
