Lima ka Local Government Units ang reported nga nakapanimaho sang asupre gikan sa Bulkan Kanlaon kahapon.
Suno kay Negros Occidental Provincial Disaster Risk Reduction and Management Office (PDRRMO) Head Irene Bel Ploteña, ang lima ka LGU’s ang ginalakipan sang ciudad sang La Carlota, Bago, La Castellana kag banwa sang Pontevedra kag Moises Padilla.
Sa ciudad sang La Castellana, apektado ang barangay Mansalanao, Masulog, Robles, Kamandag kag Sag-ang; sa banwa sang Moises Padilla apektado ang brgy Odiong, Guinpanaan, Montilla, Macagahay, kag Quintin Remo; sa ciudad sang Bago apektado ang brgy Ilijan, Bacong, Mailum, Ma-ao, kag Malingin; sa ciudad sang La Carlota apektado ang brgy San Miguel, Yubo, Araal, Haguimit, Nagasi, kag La Granja; kag banwa sang Pontevedra kun sa diin naeksperyensyahan ang baho sang asupre sa city proper.
Suno kay Ploteña, nubo ang narekord nga gas emission apang ang huyop sang hangin ang nangin rason kun ngaa naeksperyensyahan sa lima ka LGU’s ang baho sang asupre.
Pahayag sini, gin-abisohan na ang Local Disaster Risk Reduction Management Office (LDRRMO) sang mga LGU’s nga irekomendar ang pagpasuksok sang facemask sa mga pumuluyo.
