Lima ka mga empleyado sang Bacolod City government ang gindagdagan sang show cause order kasunod sang ila pahayag nga nadula ang mga salakyan nga yara sa ila custody gani indi na maaccount.
Madumduman nga may 122 ka mga vehicles sang Bacolod City government nga unaccounted sang ginpatigayon ang imbentaryo sang bulan sang Enero gani gintsekyar ang mga ini sa mga barangay kag iban pa nga gin-issuehan sini pila na ka tuig ang nakaligad.
Nagdangat sa 45 ka mga empleyado ang gindagdagan sang notice to explain agud makapaathag kun sa diin ang mga salakyan.
Apang may yara sang lima ka empleyado sang city government nga custodian sang mga salakyan nga nagpahayag nga nadula ang mga salakyan bangud ginkawat gani sila ang gin-issuehan sang show cause order.
Suno kay City Legal Officer Atty. Romeo Carlos Ting Jr., wala nakumpleto ang husto nga procedure para sa pagreport sang nadula nga salakyan.
Base sa procedure suno kay Ting, dapat ireport sa Commission on Audit nga nadula ang salakyan agud indi mamalayran diri.
Apang wala ini nasunod sang mga empleyado bangud kutob lang sila sa blotter sa police station.
Suno kay Ting, indi pa mahibaluan kun batunon sang COA ang report angot sa pagkadula sang salakyan ukon bayaran ini.
