Isa ka prison break ang nagluntad sa Cell Number 2 sang Manjuyod District Jail sa probinsiya sang Negror Oriental kaina sang kaagahon kun sa diin lima ka priso ang nakapalagyo.
Alas-5:30 kaina sang kaagahon sang nadiskubrehan ni SJO1 Christopher Sarsuelo nga ginguba sang mga priso ang dingding sang Cell No.2 kag sang nagpatigayon sang head counts kulang na ang mga inmates.
Nakilala ang mga nakapalagyo nga sanday Janly Callao, 39-anyos sang Brgy. Matauta, Tayasan, nga may kaso nga rape; Julan Paculanag, 30, sang Brgy. Apanangon, Jimalalud, nga may kaso man nga rape; Ronnie Flores, 25, sang Sitio. Naguod, Brgy. Nagbalaye, Sta. Catalina, nga may kaso nga llegal Possession of Firearms; Joseph Casido, 49-anyos sang So. Mansalaway, Brgy. Cabcaban, Manjuyod, nga may kaso nga murder kag Lito Pedro, 49, sang Brgy. Apanangon, Jimalalud kag may kaso man nga rape.
Sa karun nagapadayon ang pagpangita sang Manjuyod Police Station upod sa Manjuyod District Jail personnel sa mga pugante.
