Lima ang nadakpan sa pagpatigayon sang illegal nga bulang sa Sitio Tu-ong, Barangay Alangilan, Bacolod City, kahapon sang hapon.
Sa joint operation nga ginpatigayon sang Criminal Investigation and Detection Group (CIDG) kaupod ang Bacolod City Police Office (BCPO) Station 5, nadakpan sanday Richard Possession, 52 anyos residente sang nasambit nga lugar, Richard Valente, 39 anyos; Vincent Asoy, 36 anyos; Alimar Tamboong, 27 anyos; kag si Maryo Gaudiano, 30 anyos, lunsay mga residente sang Prk 9, Brgy Alangilan, Bacolod City.
Samtang at large naman ang ginkilala kay Jejomar Yee, 30 anyos residente sang Barangay Granada, Bacolod City.
Suno kay P/Lt. Col. Anthony Gantang, Provincial Officer sa Provincial Field Unit sang CIDG bangod sa malayo pa ang lalakton kag padulhog ang lugar, madali nga natukiban sang mga nagapatigayon sang bulang kag sang look out ang mga nagapadulong nga kapulisan.
Gilayon naman nga nagdinalagan ang mga kabahin sa ilegal nga buluhaton sa nagkalain-lain nga direksyon rason nga ang lima lang ang nadakpan.
Nakumpiskar gikan sa operasyon ang 17 ka buhi nga manok gamit pambulang samtang napulo naman ang patay.
Ang mga nadakpan ang pasakaan sang kaso angot sa Presidential Decree 449 ukon ang cock fighting law kag Republic Act 11469 ukon ang bayanihan to heal as one act bangod sa bayolasyon sa pagpatuman sang social gatherings.
Dugang pa ni Gantang nga posible man magapangatubang sang kaso ang tag-iya sang manokan nga ginkilala kay Engr. Marlon Possession bangod dako ang posibilidad nga nakahibalo ini natuhoy sa ilegal nga operasyon.
