Pilason ang isa ka lima ka tuig nga bata nga babayi matapos masagaid sang isa ka salakyan ang e-bike sa dalan Lacson, Barangay Mandalagan, Bacolod City pasado alas-10:00 kagab-i.
Sa interview sang Bombo Radyo Bacolod kay Police Staff Sgt Richard Dema-ala, traffic investigator sa Bacolod Police Station 3, nabatun nila ang report natuhoy sa traffic incident alas-10:20 kagab-i.
Sa inisyal nga imbestigasyon, ang salakyan nga Nissan Almera kag ang e-bike ang parehas nga nagabyahe gikan sa norte padulong sa sur nga dereksyon.
Ang e-bike ang ginamaneho naman ni Kenneth Britania, residente sa Barangay Bata, Bacolod City samtang angkas sini ang iya nga asawa nga si Mitch Joy Tupaz kag ang duha ka kabataan nga edad singko anyos kag ang lima ka bulan nga lapsag.
Suno kay Dema-ala, yara sa inner lane ang e-bike sang hinali na lamang nga nag-overtake ang Nissan Almera.
Apang sang magbalik sa inner lane ang salakyan, nasagaid sini ang e-bike gani ini ang natumba, samtang nakaangkon naman sang minor injury ang lima ka tuig nga bata.
Ang bata ang gilayon naman nga gindala sa Riverside Medical Center para sa medical check-up.
Madamo naman sang nakawitness sa insidente ilabi na nga ini ang natabo sa atubang sang Business Process Outsourcing (BPO) company.
Ang driver sang salakyan ang gindala naman sa Bacolod Police Station 3.
Suno kay Dema-ala, ang e-bike ang may-ara man sang violation bangod ginadumilian ang pagbyahe sini sa mga National Highway, gani mahimo man ini mamultahan sang City Government.
