Patay na sang masapwan ang 5 anyos nga bata nga lalaki matapos nga makadalin-as kag malumos sa kapin isa ka metro nga kalog kag nasulod sa tamburong sa bahin sang Hillside Subdivision, Barangay Mansilingan, Bacolod City pasado alas-12:00 kaina sang udto.
Nahibaluan nga kaupod sang biktima ang iya nga 10 ka tuig nga magulang kag iban pa nga mga kabataan samtang nagapanglakaton na kuntani pauli gikan sa paghampang.
Bangod sa mabaskog nga pag-ulan, nagbaha naman sa nasambit nga lugar kun sa diin nalapawan na ang dalan kag indi na kitaon ang nasambit nga kalog.
Santo sa magulang sang biktima nga ginkilala kay alyas Boyboy, ginhambalan na ang mga ini sang isa ka babayi nga indi maglakat sa bahin sang kalog, apang didto gihapon ang mga ini nagtindog.
Tubtob sa nakadalin-as ang 5 anyos nga bata, kag ang ulihi nalang nga nakita sang magulang amo ang nagatuhaw pa sini nga ulo, apang wala na sini masalbar pa.
Ang bata ang gina-alegar nagsulod sa tamburong nga lapos naman sa bahin sang Panaad Park and Stadium sa nasambit nga Barangay.
Samtang, ginpahayag naman ni Punong Barangay Rodolfo Pico nga nasapwan nila nga wala na sang kabuhi ang bata sa sulod sang tamburong.
Gina amat-amat sang mga ini sa paghusoy ang kalog kag may-ara naman sang nagabantay sa pihak nga bahin sang tamburong.
Ginatinguhaan sang mga ini nga maklaro ang tamburong kun sa diin mahimo masalawid ang bata bangod sa mga nagasupon nga sagbot.
Suno kay Pico, malayo pa ang balay sang mga kabataan sa lugar kag mahimo nga naghampang lang sa lugar.
Nahibaluan nga yara sa Saudi Arabia ang iloy sang kabataan kag separado naman ini sa bana.
