Lima tubtob anom ka mga doctor nagikan sa nagkalain-lain nga district hospitals sa Negros Occidental ang natalana nga i-augment sa Cebu suno sa mando sang Department of Health.
Sa interview sang Bombo Radyo kay Governor Eugenio Jose “Bong” Lacson, ginpahayag sini nga plano sang DOH nga mag-augment sang mga doctors nagikan sa Western Visayas padulong sa Cebu sa sulod sang duha ka semana agud magbulig sa padayon nga pagsaka sang mga kaso kag lima tubtob anum diri ang pagakuhan sa probinsya.
Apang suno kay Lacson, sang ginkonsulta sini ang mga chief executives sang mga ospital kun sa diin nagaubra ang nasambit nga doktor, wala sila nagakompormi sa nasambit nga tikang.
Suno sa gobernador, wala ini nakihabalo kun sarang nga makapanghindi ang mga chief executives bangud mando ini sang national government.
Suno diri, Hunyo 25 pa sang nagpagwa sang memorandum ang DOH kag plano sang ahensya nga amat-amat nga mapadala ang mga doktor tubtob Hulyo 5.
Aminado man ini nga nagakinahanglan ang Cebu sang bulig kag maswerte ang mga Negrense bangud wala kita sa ila nga posisyon.
