Duha ka barge nga may karga nga limestone ang nagtakilid bangod sa dalagko nga pagbalod sa Campomanes Bay, Brgy Maricalum, ciudad sang Sipalay, Negros Occidental.
Sa interview sang Bombo Radyo Bacolod kay Dionelo Bogtae, Executive Assistant for Operations sang Sipalay City, sang Biyernes nagshelter sa Campomanes bay ang apat ka barge naggikan sa Bohol kag nagabyahe padulong sa Rio Tuba sa banwa sang Bataraza sa Palawan bangod sa malain nga panahon.
Apang, bangod sa makusog nga pagbalod nautod ang kable sang angkla kag gin-anod ang duha ka barge tubtob nga natongtong ini sa bato kag nagtakilid.
Ang isa ka barge ang nagakarga sang 7,500 metric tons sang limestone kag iban diri ang naula sa baybay.
Sa karun padayon ang imbestigasyon sa impact sang naula nga limestone samtang hilway naman ang 11 ka crew.
