Ginkoronahan na ang bag-o nga Lin-ay Sang Negros 2026 sa Panaad Park and Stadium sa ginhiwat nga coronation night nga kabahin sang selebrasyon sang Panaad sa Negros Festival 2026 Pearl Anniversary.
Ginproklamar nga Lin-ay Sang Negros 2026 si Jamaicah Bantigue sang banwa sang Salvador Benedicto matapos niya ginsabat ang final question natuhoy sa kahulugan sang “panaad” kag kun paano ini mapatuman bilang konkreto nga aksyon.
Ginpahayag ni Bantigue nga iya ini ipakita pinaagi sa iya adbokasiya sa mental health.
Ginpakigbahin niya ang iya personal nga eksperyensya sa anxiety kag depression kag ang pagtaliwan sang mga hinigugma niya sa kabuhi, nga amo naghatag sa iya inspirasyon nga magpaninguha para sa pagpatukod sang You Matter Organization sa Negros Occidental.
Iya ginpahayag nga mahimo matuman ang mga programa angot diri kun magbinuligay ang tanan ilabi na ang lokal nga panguluhan kag provincial government.
Nagsunod sa Don Salvador Benedicto bilang 1st Runner-Up si Johana Marie Oyog sang Kabankalan, 2nd Runner-Up si Kimberly Kate Payumo sang Talisay, 3rd Runner-Up si Elisha Krizzle Escultura sang Cauayan, kag 4th Runner-Up si Glazel Bayona sang Calatrava.
Sa bahin sang nagkalain-lain nga special awards, naangkon ni Oyog sang Kabankalan ang Best in Evening Gown samtang si Ysabella Wuthrich sang Bacolod ang nagdaog sa Best in Swimwear kag Best in Festival Costume.
Ginpasidunggan man si Bantigue sang Salvador Benedicto bilang Best in Talent, samtang ginpili naman si Charhaey Apatan sang San Carlos bilang Best in Opening Production Number.
Ang People’s Choice Award ang ginbaton ni Erish Jean Cascarro sang La Carlota, samtang si Sofia Ignalague sang Murcia ang ginpasidunggan bilang Miss Photogenic kag si Jonalyn Diamena sang Valladolid bilang Miss Congeniality.
Ang Best Evening Gown Designer naman ang gin-angkon ni Pamela Rodrigo sang Isabela kag ang Best in Festival Costume Designer ang nakuha ni Emirose Rull sang Hinigaran.
