Ginkoronahan si bilang Lin-ay sang Negros 2025 si Jada Biaxyl Celeste sang Victorias City sa pageant nga ginpatigayon sa Panaad Park and Stadium, Marso 28.
First runner up si Maxine Louise Martin sang Ilog samtang second runner up naman ang Lin-ay sang Manapla nga si Julianah Cassandra Makila.
Nakuha man ni Celeste ang Best in Swimwear kag Best in Evening Gown awards.
Sa final round sang question and answer portion, ginpamangkot si Celeste kun ano ang iya malaygay sa iya suod nga abyan nga nagatinguha nga indi pagtumanon ang iya saad?
Ginsabat ini ni Celeste nga iya paga-istoryahon ang nasambit nga abyan nga ang mga promisa ang wala ginaguba kundi ginatuman kaangay na lamang sa ginahimo sang mga pumuluyo sa Negros Occidental paagi sa pag-isa sang nagkalain-lain nga mga local government units agud tumanon ang ila mga promisa paagi sa Panaad sa Negros.
Bangud sa pinasahi sini nga sabat, iya nakuha ang korona.
Back-to-back ang kadalag-an sang Victorias City sa Lin-ay sang Negros bangud sang tinalikdan nga tuig, sa nasambit nga ciudad man nagikan si Lin-ay sang Negros 2024 Kyla Rose Romarate.
