Nagtaliwan na ang 34 anyos nga lineman sang Negros Electric and Power Corporation (NEPC) nga una na nangin kritikal matapos nga madagdag samtang nagapatigayon sang vegetation clearing sa Circumferential Road, Brgy Villamonte, Bacolod City sang Domingo sang hapon.
Ginkilala ini kay Jessie James Torremocha residente sang ciudad sang Davao apang nagatrabaho diri sa Bacolod.
Siya ang nadulaan sang kabuhi kagab-i sa Intensive Care Unit sang Metro Bacolod Hospital.
Nagpadangat na sang pagpakig-unong ang pamunuan sang NEPC sa nalisdan nga pamilya.
Nagapangayo man ang mga ini sang pagpangamuyo kasunod sang pagtaliwan sang ila nga empleyado.
Madumduman nga sang Domingo sang hapon, nagpatigayon sang vegetation clearing si Torremocha sa pag-utod sang mga sanga nga nagasablay sa kuryente.
Magasaylo na ini kuntani sa pihak nga sanga apang sang hana nga isaylo ang iya harness siya ang hinali nga nadagdag.
Nahulog sa kapin 30 feet si Torremocha kag una nga nagtupa ang ulo sini gani apisar may yara sang hard hat, siya ang nangin kritikal bangod sa makusog nga impact.
