Kritikal ang kondisyon sang 34 anyos nga lineman sang Negros Electric and Power Corporation (NEPC) matapos nga madagdag samtang nagapatigayon sang vegetation clearing sa Circumferential Road, Brgy Villamonte, Bacolod City, kahapon, kapin alas- 3:00 sang hapon.
Sa interview sang Bombo Radyo kay Jonathan Cabrera, spokesperson sang NEPC, ang lineman amo si Jessie James Torremocha nga residente sang ciudad sang Davao kag nagatrabaho diri sa Bacolod.
Suno diri, kahapon nagpatigayon sang vegetation clearing si Torremocha sa pag-utod sang mga sanga nga nagasablay sa kuryente apang magasaylo ini kuntani sa pihak nga sanga kag naghana nga isaylo ang iya harness sang hinali ini nga nadagdag.
Nahulog sa kapin 30 feet si Torremocha kag una nga nagtupa ang ulo sini nga apisar may yara ini sang hard hat makusog sa gihapon ang impact.
Na-comatose si Torremocha nga sa karun yara sa intensive care unit kag suno sa doktor delikado ang status sini.
Napahibalo naman sang NEPC ang pamilya ni Torremocha kag naka-abot na ang asawa sini diri sa ciudad.
