Nagdangat sa linibo ka mga nagatrabaho sa crab industry sa Pilipinas ang apektado matapos nga banned na sa pag-export sang blue crab sa Estados Unidos ang pungsod epektibo subong nga adlaw, Hunyo 11, 2026 bangud sa gina-alegar nga indi pag-comply sa American marine mammal protection laws.
Sa interview kay anay EB Magalona Mayor Alfonso “Diding” Gamboa, isa sa mga crab exporter, bangud sa banning maapektuhan ang kapin P6 billion annual crab exports kun sa diin 90 percent sini ang nagakadto sa US Market.
Nahibaluan nga ang probinsya sang Negros Occidental ang pinakadako nga naga-export sang blue crab.
Suno kay Gamboa, napaslawan ang Bureau of Fisheries and Aquatic Resources nga depensahan ang Pilipinas batok sa gina-alegar nga paglapas sang pungsod sa provision sang US Marine Mammal Protection Act.
Suno kay Gamboa ang ginapahayag nga bayolasyon ang nag-ugat sa mga reports sadtong 2010 nga may entangled sang Irrawaddy dolphins sa ginagamit sa pagkuha sang kasag.
Suno diri, ang iban nga Asian countries kaangay India, Sri Lanka, Indonesia kag Vietnam nga gin-alegar nga naglapas man apang nakapasa sang appeal magluwas lamang sa Pilipinas bangud sa gina-alegar nga kapaslawan sang BFAR.
Apektado sini ang Concepcion sa Iloilo kag iban pa apang ang tuman nga maapektuhan ang Negros bangud ini ang may dako nga bahin sa pag-export sang crab products.
Apektado man ang 10,000 ka mga mangingisda sa Visayan Sea kasubong man ang kapin P4000 tubtob P5000 ka mga manugkasag.
Dugang pa ni Gamboa nga may iban man nga export market kaangay sang China kag European Union apang mas gamay ini kun ipaanggid sa US Market.
