Ginkumpirmar sang incharge sa vaccine distribution sa Negros Occidental nga madamo pa sang mga bakuna sa cold room sang probinsya nga maga-expire na sa katapusan sang bulan sang Abril.
Sa karun, 36,720 doses pa sang Pfizer Orange Cap, ukon ang natalana para sa edad lima ka tuig tubtob onse anyos nga yara sa cold room sang Provincial Health Office.
Apang paathag ni Dra. Claudelia Josefa Pabillo, nga ang mga nasambit nga bakuna ang natalana para sa 2nd dose sang nasambit nga age group.
Ang bakuna ang natalana nga maga-expire sa Abril 15.
Samtang maga-expire naman antes ang Abril 30 ang nabilin nga supply sang Moderna Vaccine nga 4,890 doses, Astrazeneca nga 38,900 doses kag Johnson and Johnsons nga yara pa sa 140,539 doses.
Suno kay Dra Pabillo ang Food and Drugs Administration (FDA) ang nagapagwa pa sang extension sa life span sang COVID-19 vaccine.
Gani ang mga maga-expire sa Abril 30 ang mahimo pa nga ma-extend sang isa tubtob duha ka bulan.
Suno sa doktor, pagahulaton nalang nila kun ano ka lawig ang extension nga idugang sang FDA sa mga nasambit nga COVID-19 vaccine brands nga matumod man santo sa Batch Numer ukon Lot Number sang manufacturing sang mga bakuna.
Apang aminado naman ini nga may mga bakuna nga wala na ginahatagan sang extension.
Suno kay Dra Pabillo, igabalik nila sa Regional Health Office ang mga indi na magamit nga COVID-19 vaccines kag ang Department of Health (DOH) Region 6 na ang bahala sa pagdispose.
Santo sa obserbasyon sang doktor, aminado ini nga mabudlay nga mapaubos ang mga bakuna sa cold room ilabi na nga tuman ka nubo sa karun ang nagakabakunahan sa kada adlaw.
