Linibo nga mga Muslim ang nagtipon sa nagkalain-lain nga venue sa ciudad sang Bacolod agud saulugon ang Eid Al-Adha ukon Feast of Sacrifice.
Pila sa ila ang nagtipon sa Brgy 31, Brgy Mansilingan, kag iban pa, apang ang pinakamadamo ang nagtingob sa Bacolod City Government Center ground.
Sa interview sang Bombo Radyo Bacolod kay Imam Abu Aljannah Nadela Carcauga sang Muslim Community sa Bacolod City, ang mga nag-upod ang ginlakipan sang mga born Muslim, bag-o nga miyembro kag mga balik-Islam, indi lamang gikan sa Bacolod City, kundi subong man ang mga gikan sa nagkalainlain nga banwa kag ciudad sa Negros Occidental.
Dugang pa ni Carcauga nga may mga nagtambong man nga gikan pa sa Mindanao.
Ang aktibidad ang ginsuguran alas-6:30 tubtob alas-7:30 sang aga kun sa diin ini ang ginsuguran sa pangamuyo.
Kasunod sini sila ang nagbisita sa mga mosque kag balay sang mga kaupod nga muslim, kag nag-ihaw sang kanding kag baka.
Ini ang pagdumdom sa ginhimo nga pagsakripisyo ni Propeta Abraham sa iya bugtong nga anak nga si Propeta Ishmael, nga wala gintugutan ni Allah kag ginbayluhan sang karnero.
Samtang pahanumdom naman ni Yousuf Fos, anay Presidente sang Center for Islamic Studies kag Dawah of Negros, nga ang Eid Al-Adha amo ang tradisyon nga nagadumdom sa pagsakripisyo ni Propeta Abraham.
Ang karne sang kanding kag baka nga ila ihawon ang mahimo tungaon sa tag-iya nga naghalad, iban ang lutuon kag salo-salohan, kag ang iban nga karne ang igahatag sa mga pigado nga muslim.
Pangabay sini sa mga muslim nga indi lang dumdumon ang Eid Al-Adha bangod sa pagkaon, kundi sa matuod sini nga mensahe.
Nagalaom man ini nga madamo pa sang mga magatuon tuhoy sa kasuguan sang Islam kaangay sa iya.
