Nagpapanaog sang Executive Order si Bacolod City Mayor Evelio “Bing” Leonardia nga nagamando sang partial lifting sang liquor ban sa ciudad epektibo kahapon.
Sa EO No. 37 nga ginpagwa sang alkalde, nakasaad diri nga pwede makabaligya kag makabakal sang ilimnon humalin alas-12 sa udto tubtob alas-6:00 sa gab-i lamang kag dapat naga-obserbar sang social distancing kag iban pa nga mandatory health protocols ang mga bumalakal.
Mahimo lamang makainom sa mga pribado nga lugar kag hugot nga ginadumilian ang pag-inom sa guwa sang balay, sidewalk, restaurants, bars, convenience stores kag sari-sari stores.
Suno kay Leonardia, bangud sa economic reasons gani ginbatak sini “partially” ang liquor ban sa ciudad.
Madumduman nga sang Marso 23, nag-issue sang EO No. 25 ang alkalde nga nagadumili sa pagbaligya kag pag-inom sang mga makahulubog nga ilimnon sa Bacolod.
Ang sin-o man nga magabayolar sa EO 37 suno kay Leonardia ang magapangatubang sang sanctions lakip na ang suspension ukon revocation sang business permits kag license, ukon pagpasirado sang baligyaan kag posible nga pagdakop kag pagpasaka sang kaso kriminal sa pagbayolar sang Republic Act No. 11332.
Ginamanduan sini ang mga barangay kag iban pa nga mga city officials, City Legal Office-Enforcement Unit, Public Order and Safety Office, Business Permits and Licensing Office kag Bacolod City Police Office nga ipatuman ang mga probisyon sang amo nga mando.
Samtang, sa interview sang Bombo Radyo Bacolod kay BCPO spokesperson P/Lt. Col. Ariel Pico, ginpahayag sini nga naga-ayo siya sa mga pumuluyo nga moderation lang ang pag-inom kag indi magpatama.
Dugang pa sini nga ang pag-inom ang makalapas lamang sa ginapatuman nga social distancing.
Suno kay Pico, may yara sang ginapangatubang nga health crisis gani imbes nga ibakal sang ilimnon, ibakal nalang ini sang pagkaon kag mga kinahanglanon.
