Ginreklamo sang live-in partner sang eletrical engineer nga nakuryente kag napatay nagpadangat sang reklamo angot sa isa ka ospital sa Bacolod matapos nga wala ginbaton ang pasyente sa rason nga wala sang doktor nga nakaduty.
Sa interview sang Bombo Radyo kay Beth, Marso 23, alas- 10:00 sang gab-i, ila nabaton ang balita nga dead on arrival na ang live -in partner sini.
Suno diri, nagatrabaho bilang electrical engineer ang iya live-in partner sa construction site sa Megaworld kag gab-e sadtong Marso 23, nahimo pa sini nga makacontact sa iya partner apang ini ang gintawag sang electrician bangod nga may yara sang kay-uhon nga suga.
Samtang, nagatrabaho ang biktima aksidente sini nga na-utod ang live wire kag ini nakuryente.
Nakibot na lamang ang electrician nga upod sini sang nabatian nga nagasinggitan na ang bikitma.
Gilayon nga nanaog ang electrician kag ginpatay ang main breaker.
Ila man ginhatagan ang biktima sang basic first aid kag gintawagan sang rescue.
Nag-abot ang Villamonte Rescue Team, kag amo nga nag-akomodar sa biktima kag ini ang gindala sa Metro Bacolod Hospital and Medical Center sa Barangay Estefania.// Sa pahayag sang rescue team, may senyales pa sang kabuhi ang biktima sang yara na didto sa ospital.
Ini pa gindala sa pasulod sa emergency room sang rescue team agud mahatagan sang padayon nga medical treatment.
Apang, wala ginbaton sang ospital ang biktima sa rason nga wala ini sang immediate family, bangod nga yara sa emerhensya nag-ayo ang rescue team nga sila na lang ang magarepresentar para sa biktima.
Apang, nagrason naman ang ospital nga wala sang doktor nga nakaduty sadtong gab-i.
Nagdesisyon na lang ang rescue team nga dal-on sa Corazon Locsin Montelibano Memorial Regional Hospital ang biktima apang wala na ini natabangan kag gindeklarar nga dead on arrival.
Pahayag ni Beth, kun kritikal naman gid ang kondisyon sang iya live-in partner, naga-ayo gid lamang ini nga kun may tsansa pa tani nga mabatian sila antes ini magpahuway.
Nagpanugyan man si Beth nga indi na kuntani ini maliwat pa bangod nga ini mabudlay kag masakit.
Ginatinguhaan pa sang Bombo Radyo nga makuha ang pahayag sang Metro Bacolod Hospital angot diri.
