Pagatutukan sang ciudad sang Bacolod ang paghimo sang solusyon sa liwat nga pagdagsa sang mga badjao subong nga Disyembre.
Sa interview kay Bacolod City Administrator Atty Mark Steven Mayo, nagalab-ot na sa ila ang impormasyon sang liwat nga pagdamo sang mga badjao sang magsulod ang Disyembre.
Madumduman nga sang tinalikdan nga Oktubre, madamo sang mga badjao ang ginpapauli kag gindul-ong mismo sang Department of Social Services and Development sa Jolo, Sulu.
Nagapati si Mayo nga ang mga ginpapauli amo gihapon ang mga nagbinalik subong nga Disyembre.
Samtang sa monitoring sang Bombo News Team, natalupangdan man nga nag-upgrade na ang mga badjao, bangod ang anay puti nga sobre nga ginaduhol sa mga pasahero sang jeep ang sa karun nangin ampao na.
Nakita man ang mga ini nga hilira nga nagatinulog sa dalan sa kilid sang Bacolod City Public Plaza.
Ginapakamaayo naman ni Mayo nga wala pa sila sang nabatun nga reports sang mga harrassment.
Pasalig sini nga ginconvene na ang members sang Anti-Mendicancy Task Force kag tutukan sang mga ini ang pagduging sang mga badjao subong nga Disyembre.
Apang aminado man si Mayo nga indi man nila mapunggan ang mga badjao nga magbyahe, bangod ini ang ila man kinamatarong.
Padayun nga ginapahanumdom nga indi maghatag sang kwarta sa mga mendicants.
Ang multa para sa madakpan nga nagahatag sang limos kag nagapanglimos ang ginpasaka na sa P1,000 sa idalom sang Anti-Mendicancy Law.
