Duha ka posibilidad ang ginalantaw sang anay Health secretary nga rason sa liwat nga pagpositibo sa COVID test sang pasyente nga nagnegatibo na sa repeat RT-PCR test.
Nahibaluan nga ang Bacolod Patient No. 28 nga isa ka 23-anyos nga lalaki kag isa ka seafarer nga may port of exit sa Brazil sadtong Abril 11, 2020 ang liwat nga nagpositibo sa balatian pag-abot sa Bacolod.
Sadto sa rekord sang Department of Health, gin-admit ini sa ospital sa Brazil sa sulod sang 19 ka adlaw bangud sa coronavirus.
Gindischarge ini sang Abril 11 matapos mag-improve ang kondisyon kag naglupad ini padulong sa Manila sa pareho nga adlaw.
Nagpaidalom siya sa quarantine sa Manila tubtob Hunyo 10 kag ginpaidalom sa repeat RT-PCR test isa ka semana antes pa ang pagpauli sini sa syudad sang Bacolod kun sa diin nagnegatibo ang resulta.
Si Patient No. 28 ang ginpaidalom liwat sa RT-PCR test sang ini ang nakaabot na sa siyudad kag sang naggwa ang resulta, ini ang nagpositibo.
Sa interview sang Bombo Radyo kay anay Health Secretary kag sa karon Iloilo 1st District Rep. Janette Garin, ginalantaw sini nga mahimo sa mega swabbing centers nagpakuha sang sample si Bacolod Patient #28 kun sa diin ginapatihan nga sala ang proseso sang pagpatigayon sang swab test.
Suno kay Garin, ang dapat magkuha sang sample ang mga medically trained personnel bangud ang mga ini ang may ihibalo sa pagkuha sang test bangud ang sample nga ginakuha ang dapat cells kun sa diin makita sa lining sa respiratory indi ang debris ukon sip-on kag laway bangud sa cells makita ang virus.
Apisar nga indi na infectious ang tawo nga nadiagnose nga positibo sa Covid kag wala na sang ginapakita nga sintomas, nagpanugyan ini nga mas maayo nga ibutang sa gihapon sa isolation facility ang pasyente agud wala na sang malatnan.
Ipabilin man ang pagpractice sang proper waste disposal agud malikawan ang dugang nga paglapta sang virus.
Samtang, gindayaw man sini ang probinsya sang Negros Occidental bangud may yara na ini sang kaugalingon nga molecular laboratory kun sa diin mas mahapos ini nga makatumod sang positibo kag ma-isolate gilayon kag masiguro nga indi na makalaton pa.
