Nagapakig-unong ang alkalde sa syudad sang Cadiz sa pamilya sang apat ka mga nalumos sa Cabilang-bilangan reef sa Barangay Sicaba, Cadiz City, Negros Occidental kahapon.
Sa interview sang Bombo Radyo Bacolod kay Mayor Salvador “Bading” Escalante, may ginhatagan na ini sang instruction nga magbisita sa nalisdan nga pamilya.
Suno kay Escalante, ang syudad sang Cadiz ang magasabat sang embalming kag magahatag sang gamay nga kantidad bilang bulig sa galastuhon sa haya sang mga biktima.
Suno diri, dugay na ini nagapaandam sa publiko sang Cadiz nga likawan ang pagpadulong sa Cabilang-bilangan reef bangud tuman kabaskog ang current sang tubig diri ilabi na kun maghunas.
Pila sa mga insidente nga napatay bangud sa mabaskog nga current sang tubig ang nagpanginhas sa reef kag ang nadisgrasya matapos nga magdive nagikan sa tower nga nagtupa sa balas bangud hinali lamang naghunas.
Suno kay Escalante, ang mabaskog nga current sang tubig ang rason sang pagkalumos sang apat kasunod sang paghunas.
Madumduman nga una naglumpat ang 15 anyos nga bata nga lalaki agud maligo apang ini ang nalunod bangud sa mabaskog nga current sang tubig kun sa diin luwason kuntani sang iloy kag sang duha pa sini nga kaupod ang lunsay man nga nalumos bangud sa mabaskog nga current sang tubig.
Ginalantaw man sini nga himuon nalang nga tourists spot ang Cabilang-bilangan reef sa baylo nga permanente nga siraduhon ini sa publiko.
Suno kay Escalante, manami ang Cabilang-bilangan reef sa Barangay Sicaba, Cadiz City gani madami ang nagakadto diri apisar nga tuman kabaskog ang kuryente sang tubig ilabi na kun maghunas.
Suno kay Escalante, tuman ka tin-aw ang tubig sa Cabilang-bilangan reef gani manami ini nga mangin tourists spot.
Plano sini sa karun nga sundon ang ginhimo sang Bais City sa sand bar agud nga maregulate nalang komparar sa permanente nga siraduhon sa publiko ang lugar nga indi malikawan nga masulit ang insidente bangud may mga residente nga sekreto nga magpadulong sa gihapon sa lugar.
Naestorya naman sang alkalde ang Punong Barangay sang Barangay Sicaba angot sa plano sini nga himuon nga tourists destination ang sandbar kag may yara naman sang asosasyon sang mga environmentalists nga maghandle sang operasyon sa tion nga madayon na ang ginalantaw nga intervention sa syudad agud nga malikawan na ang insidente sa pagkalumos sa lugar bangud maregulate na kag may yara na sang mabantay sa nagapadulong diri.
Sa karun temporaryo nga isirado sa publiko sa Cabilang-bilangan reef matapos ang nagluntad nga drowning incident kahapon.
Nagpanugyan man ini sa tanan nga magapadulong sa lugar nga makig-angot sa barangay, sa coast guard kag sa mga kapulisan agud sila ang mabantayan kag malikawan nga masulit ang nagluntad nga insidente kahapon.
