Pirmado na ang loan agreement sa tunga sang city government sang Bacolod kag sang Development Bank of the Philippines kag ini ang ginpatigayon sa Bacolod City Government Center kahapon.
Magaloan ang city government sang P4.441 billion sa DBP agud nga pondohan ang mga development projects sang Benitez administration.
Ang signing sang loan agreement sa tunga sang LGU kag DBP ang gintambungan sang mga opisyales sang syudad sang Bacolod.
Yara man agud nga magsaksi ang mga punong barangay kag konsehal.
Ginpasalamatan ni Bacolod City Mayor Alfredo Benitez ang pag-aprubar sang konseho sa paghatag sa iya sang otoridad nga magpirma sang nasambit nga agreement.
Ginpasalamatan man sini ang mga punong barangay nga nag-aprubar sa mga proyekto paagi sa City Development Council.
Ginakabig naman sang alkalde nga best deal ang gintanyag sang DBP bangud may yara lamang ini sang 3.55 percent per annum nga interest rate.
Ang loan ang pagabayaran sang syudad sa sulod sang pito tubtob 15 ka tuig nakadepende sa ipatuman nga proyekto.
Nalakip sa listahan sang mga proyekto nga gamitan sang ginloan nga pondo amo ang pagpatukod sang legislative building; pagbakal sang LGU sang duta para patindugan sang pila ka mga proyekto; pagpatukod kag development sang mga mini hospitals kag pagpanami kag pagrehab sang mga Public Markets.
Suno sa alkalde wala malakip sa listahan sang mga proyekto para sa loan ang underground cabling, pagpatindog sang archive center kag mga street lights.
Suno diri ang wala malakip sa listahan sang mga proyekto ang ipaagi sa Public Private Partnership kaangay lamang sang underground cabling.
Suno kay Benitez, tanan nga mga proyekto ang liwat isumiter sa Sangguniang Panlungsod para sa ila nga approval.
Ginalantaw naman sini nga ang mga proyekto ang makahatag sang dugang nga trabaho sa syudad kag makabulig sa lokal nga ekonomiya.
