Nagpatigayon sang water rationing ang Local Government Unit sang Bago City, Negros Occidental sa mga Barangay nga apektado ang water source sang abo kasunod sa paglupok sang Bulkan Kanlaon sang Biyernes sang gab-i.
Sa interview sang Bombo Radyo Bacolod kay Ryan Valero, operations and warning head sang Bago City Disaster Risk Reduction and Management Office, sa nagluntad nga minor explosive eruption sa bulkan, napulo ka mga Brgy sa ciudad ang naapektohan sang ashfall.
Ini ginalakipan sang Brgy Mailum, Brgy Ma-ao, Ilijan, Bacong, Abuanan, Dulao, Tabunan, Don Jorge Araneta, Taloc kag Binubuhan kun sa diin ang Brgy Mailum ang tuman gid nga naapektohan.
Suno kay Velaro, santo sa order ni Bago City Mayor Mayette Javellana- Yao, alas- 9:00 kahapon sang aga nagconduct sila sang water rationing sang mainom nga tubig bangod apektado ang water source sa pila ka bahin sang ciudad.
Pahayag sini, ipaidalum pa sa testing ang tubig halin sa ila water source antes liwat nga magamit sang mga pumuluyo.
Dugang pa sini, sa 23 ka purok sa Brgy Mailum, tatlo lamang ka purok ang wala maayo naapektohan sang ashfall.
Focus nila sa karun nga mabuligan ang Brgy Mailum apang nagpasalig ini nga wala man ginapabay-an ang iban nga affected Brgys.
Paandam ni Valero, pilion ang mga lehitimo nga impormasyon, magpreparar sang go bags, mag-evacuate kun kinahanglan kag hibalo-on ang mga emergency hotlines agud makapangayo sang bulig kun may emerhensya.
