Nakahanda na ang mga Local Government Units sa probinsya sang Negros Occidental para sa bagyo Enteng.
Suno kay Silay City Mayor Joedith Gallego, alas- 4:00 kaina sang kaagahon nagpagwa ini sang abiso nga kanselado ang klase sa private kag public schools para sa preschool tubtob sa high school.
Suno diri, nagpatigayon man ini sang meeting kaupod ang City Disaster Risk Reduction Management (CDRRM) kag task force La Niña nga gintukod kadungan sang task force El Niño sang ciudad.
Sa 16 ka brgy sa ciudad, hugot nga ginabantayan ang mga areas nga malapit sa dagat kag masami nga nagaeksperyensya sang pagbaha kaangay sang Brgy Mambulac kag Brgy Rizal kasubong man ang Brgy Guimbalaon kag Brgy Patag kun sa diin posible magluntad ang landslide.
Samtang, nagdesisyon naman ang alkalde sang banwa sang Hinobaan nga magkansela sang klase para sa safety sang tanan.
Suno kay Hinobaan Mayor Daph Reliquias, kaina sang aga wala nagbubo ang ulan apang kapin alas- 10:00 sang aga nag-umpisa nga mag-ulan.
Suno diri, alas- 10:00 pa lamang sang gab-i, kagab-i nagpagwa na ini sang abiso nga wala sang klase subong nga adlaw.
Naghatag man ini sang abiso sa mga mananagat nga likawan ang pagpadagat subong nga may Bagyo Enteng.
