Ginbuyagyag sang local rice farmer nga nagakinahanglan pa sang padanlog antes baklon sang National Food Authority (NFA) ang ginabaligya nga bugas.
Sa interview sang Bombo Radyo Bacolod kay Beltran Villanueva, rice farmer kag rice retailer sa Burgos Public Market, may abyan ini nga nagbaligya sang 300 ka sako sang humay sa NFA.
Apang antes ginbatun, kinahanglan pa sini nga magbayad sang padanlog nga P10,000.
Sa ikaduha sini nga balik agud magbaligya kuntani sang 150 ka sako sang humay, ang iya abyan ang wala na naghatag sang padanlog, gani wala man ginbatun sang NFA ang iya mga bugas.
Suno diri, nagastuhan lamang ang iya abyan sa hauling kag transportasyon padulong sa NFA warehouse.
Wala man sang dako nga bulig ang paghatag sang gobyerno sang truck sa mga farmers association, bangod ini ang indi man nila magamit sa pagtanom kag pagpatubo sang humay.
Panawagan sini nga kun paano nga ginasubsidize ang bugas nga ginabaligya, mas nagakadapat nga isubsidize ang farmers sa ginagami nga abono kag bulong.
Pahanumdom sini nga kun magnubo ang ila gastos sa pagtanom kag pagbuhi sang humay, automatic man nga maganubo ang presyo gani indi lamang limitado nga sektor ang makabenepisyo kundi tanan nga pumuluyo.
Pahayag sini nga ang anay P19 tubtob P23 kada kilo nga presyuhanay sang humay, sa karun ang nagpanaog na sa P12 tubtob P13 kada kilo sumugod sang ginpatuman ang P20 per kilo rice program nga ginakahangawa sini nga magpanaog pa sa P10 kada kilo.
Kun magapadayun, ginalantaw ni Beltran ang posibilidad nga madamo sa mga farmers ang maga-untat na sa pagtanom sang humay, kag ang gobyerno ang magasalig nagid lamang sa importasyon.
