Nagsapol sang Huwebes ang local school board sa ciudad sang Bacolod agud athagon ang plano sang Department of Education (DepEd) nga ibalik ang face-to-face classes sa masunod nga tuig.
Sa interview sang Bombo Radyo Bacolod kay Councilor Renecito Novero, chairman sang Committee on Education sa Sangguniang Panlungsod sang Bacolod, ginpahayag sini nga luyag mahibaluan sang city government kun ano gid man ang plano sang DepEd agud makapangaman kag makahanda man ang ciudad ilabi na nga ginagamit karon bilang quarantine facilities ang mga eskwelahan.
Nahibaluan nga may yara karon sang kapin 1,200 bed-capacity sa mga school quarantine facilities.
Suno kay Novero, ginpahibalo siya ni Bacolod Schools Division Superintended Gladys Amelaine Sales nga isa sa mga posible matabo amo nga magabalik ang face-to-face classes sa mga Senior High School students kag kindergarten lamang.
Paathag sini nga may yara sang kabudlayan kun indi face-to-face ang mode of instruction sa mga kindergarten pupils.
Posible naman nga sa 3rd ukon 4th quarter pa sang School Year 2020-2021 magaresume ang face-to-face classes sa elementary kag Junio High School.
Apang suno kay Novero magadepende ini gihapon sa approval ni Presidente Rodrigo Duterte.
Ginalantaw man sang konsehal nga hulaton sa gihapon sang presidente nga mangin available na ang COVID vaccine antes magbalik ang face-to-face classes.
