Magapatigayon sang rally ang Bacolod Alliance for Commuters Operators and Drivers (BACOD) subong nga adlaw sa talatapan sang Land Transportation Office – Bacolod kag Bacolod City Government Center.
Sa interview sang Bombo Radyo Bacolod kay Rudy Catedral, chairman sang BACOD, kapin sa 500 ka mga miyembro sang BACOD ang magapakigbahin sa rally nga maga-umpisa alas 6:00 sang aga tubtob sa hapon.
Suno diri, sila maga-umpisa sang ila rally protesta sa Land Transportation Office- Bacolod nga amo nga may dako nga papel kun ngaa wala nakabyahe ang iban nila nga kaupdanan bangod sa pagpangwarning sang mga ini nga indi na sila makabyahe sa liwat bangod sila ang pagadakpon.
Kasunod sini sila ang magapadulong naman sa BCGC agud ipalab-ot ang ila panawagan kay Bacolod City Mayor Alfredo Albee Benitez nga kun mahimo nga ireview ang Local Public Transport Route Plan sa ciduad nga kun wala ini wala man kun tani sang modernization program.
Luyag sini nga mapadangat sa alkalde ang ila panawagan bangod nga malapit man ang alkalde kay president Ferdinand Marcos Jr.
Samtang, pahayag ni Catedral, wala sila nagpaconsolidate bangod nga aminado sila nga indi nila ini masarangan kag wala sang husto nga sistema ang pagsulod sa mga korporasyon ukon kooperatiba.
Sa data sang Local Government Unit halin sa Land Transportation Franchising and Regulatory Board Region 6, sa 2,313 ka traditional nga jeep, 540 pa lamang ang na-consolidate ukon 23 percent samtang ang Bacolod ang may pinakanubo nga compliance sa modernization program sa Western Visayas.
