Nagsinggitan ang mga miyembro sang Bacolod Alliance for Commuters Operators and Drivers (BACOD) Incorporated sa atubang sang Land Transportation Office – Bacolod sa Purok Manayawsayaw, Barangay Mansilingan kaina sang aga.
Ang mga jeepney drivers kag operators gikan sa nagkalainlain nga routa ang nagtipon sa pagrally sa pagpanguna ni BACOD President Rudy Catedral, apang nakabantay man ang mga katapo sang kapulisan kag mga security guards sa nasambit nga opisina.
Ginpanawagan man ni Catedral ang pangalan ni LTO Head Renato Novero, nga ginatawag sini talawan bangod nagapanago lamang sa kapulisan.
Pagpanghangkat pa sini nga indi sila masarangan sang kapulisan kun sila ang magriot.
Indi sila kumporme sa pahayag sang konsehal nga wala na ini sang mahimo bangud mando sang National Government, kag para sa ila nagasunod ang opisyal apisar nga sala na ang ginapatuman.
Ginabasol man sang mga ini ang public utility vehicle modernization program nga nagresulta nga wala na sang makaon ang ila pamilya kag wala na sang mabalon sa pag-eskwela ang ila mga kabataan.
Panindugan sang mga ini nga mga dalagko nga negosyante lamang ang ginadampigan sang mga opisyales kag alegasyon pa sini nga madamo sang bu-aya sa ciudad sang Bacolod.
Bisan ang mga kapulisan nga nagabantay ang ginpahanumduman man ni Catedral nga wala nangin pulis kun wala nagsalig sa nagabyahe nga mga traditional jeepneys.
Ginpahayag man sini nga insulto man para sa ila nga sila ang ginpabantayan sa mga kapulisan nga kaangay nga sila mga rebelde apisar nga ginapakigbato lamang nila ang ila palangabuhian.
Pahanumdom pa sini nga indi makasarang ang madyutay nga modernized jeepneys sa pagcater sang madamo nga mga pasahero.
Ginsinggitan man sini nga si Land Transportation Franchising and Regulatory Board (LTFRB) Region 6 legal officer Atty Jun Altura ang wala sang kinalain sa kawatan nga nagapabor lamang sa dalagko nga kapitalista.
Ginakwestyon sang BACOD kun ngaa wala ginadakop ang mga nagabyahe nga miyembro sang Sentrong Samahan ng mga Tsuper at Operators Negros (SSTONE) kag Federation of Bacolod City Drivers Association Incorporated (FEBACDA) ang ginapahanugtan lang sa pagbyahe, samtang ang ila nga mga miyembro ang ginadakop.
Panindugan ni Catedral nga bias ang implementasyon sang gobyerno bangod ginpaboran ang iban nga transport group nga ang mga opisyales ang Job Order gikan sa Bacolod City Government.
