Ilunsyar na sang Bacolod City Government ang localized nga 911 emergency hotline sa Lunes.
Sa interview sang Bombo Radyo Bacolod kay Bacolod City Mayor Greg Gasataya, nagpadulong sa ciudad ang tiglawas sang Department of the Interior and Local Government (DILG) para sa 911 hotline para sa coordinatiom meeting, samtang yara man ang telecommunication company kag Dissaster Risk Reduction and Management Council.
Suno kay Mayor Greg nakaligad nga tuig pa niya ginhikutar nga makalunsyar sang Bacolod 911 hotline.
Ini bangod madamo sang nagacontact sa iya nga nagareklamo nga atrasado kun magtawag sa 911 bangod sa iban nga lugar pa ang nagasabat sang tawag kaangay sang Negros Occidental, Manila, Cebu, kag Iloilo.
Matapos ang inspection sang DILG officer, ginpasalig naman nga handa na ang ahensya mag-issue sang certificate to go live, nga amo na lamang ang ginahulat sang City government.
Nagpatigayon na sila sang test calls, agud maseguro nga preparado na ang system.
Ang control unit ang yara sa command center sang DRRMO sa Brgy Taculing, samtang nagpasalig naman ang telco nga seguruhon ang maayo nga internet connection agud wala sang mangin problema sa operasyon.
Ginahikutar na sang alkalde ang natalana nga launching sang Bacolod 911 hotline sa Lunes.
Pinaagi sa paglunsyar sang localized hotline, Bacolodnon na ang makacater sa mga tawag nga gikan sa Bacolod City gani lauman nga mas madasig nga makaresponder sa mga emerhensya.
Apang panawagan sang alkalde nga indi paghampangan ang 911 hotline ukon indi magtawag para lamang sa prank calls, bangod kabuhi ang nakataya.
Ini bangod mahimo nga may lehitimo nga emergency call, apang indi na makasulod bangod maunahan sang mga prank calls lamang.
Ang operator ang magaderekta sang tawag sa mga kinahanglanon nga bulig kaangay sang ambulance, bombero, rescue personnel, kag kapulisan.
