Gilayon naman nga ginkadtuan sang punong barangay sang Barangay Mansilingan, Bacolod City ang balay sang panibag-o nga Locally Stranded Individual (LSI) nga nagpositibo sa RT-PCR test.
Sa interview sang Bombo Radyo Bacolod kay Punong Barangay Rodolfo “Boy” Pico, ginpahayag sini nga ginkuha na sang City Disaster Risk Reduction Management Office (CDRRMO) ang 33-anyos nga lalaki nga pasyente nga nagikan sa Metro Manila matapos nga nag-ayo ini kay Dr. Grace Tan nga i-isolate bangud nag-ayo ang pumuluyo nga indi pag-ilockdown ang lugar kundi kuhaon na lamang ang pasyente kag i-isolate.
Napangitaan naman sang isolation area sang City Health Office (CHO) ang pasyente.
Manugtapos naman kuntani sang 14 days mandatory quarantine ang pasyente apang naggwa ang resulta sang Hulyo 10 nga ini ang positibo.
Ginpahayag man sini nga nagapanginwala ang asawa nga may close contact sa iya bana.
Apang gin-abisuhan ini sa Barangay Health Emergency Response Team (BHERT) nga magpaidalom sa strict quarantine.
Wala naman ginpabalik sang amo ang asawa sang pasyente matapos nga nahibaluan nga positibo ang iya bana.
Ginpahayag man ni Pico nga ang asawa sang pasyente ang nagadul-ong sang pagkaon sini bangud sang nagpauli ini sang Hunyo 28 tubtob sang Sabado, wala ini nagagwa sa ila balay.
Nagpanawagan man ini sa mga pumuluyo nga indi magpanic kag untaton na ang diskriminasyon.
