Nagreklamo sa Bombo Radyo Bacolod ang isa ka locally stranded individual (LSI) matapos mawasi ang resulta sang iya swab test gani wala pa sila nakagwa sa quarantine facility bisan lapaw na sa 15 dias ang ila pagtinir diri.
Suno kay Alyas Maymay, Hulyo 17 sila nag-abot sa syudad kag lima sila tanan sa isa ka kwarto.
Suno kay Maymay, ginkuhaan sila sang swab sample pagkasunod nga adlaw.
Makaligad ang isa ka semana, naggwa ang resulta sang COVID test sang tatlo ka kaupod sini sa kwarto kag lunsay negatibo apang wala ang iya lab test result kag isa ka kaupod.
Hulyo 28, nag-abot ang lab test result sang isa kag ini ang negatibo apang wala gihapon ang iya COVID test result.
Agusto 1, ginkuhaan ini liwat sang City Health Office sang swab sample bangud suno sa ila, nawasi ang iya nga resulta.
Bangud sini, wala pa nakagwa sa quarantine facility ang lima bangud suno sa CHO, dapat dungan sila tanan.
Hulaton naman ni Councilor Renecito Novero, pinuno sang Quarantine Centers Action Team (QCAT), ang resulta sang verification sang City Health Office (CHO) bangud ginpadangat naman sini ang reklamo didto.
Indi pa man sini masabat ang pamangkot kun sa diin nagkadto ang resulta bangud gwa na ini sa iya jurisdiction.
Ginpahayag man ni Novero nga may yara man sang limitasyon ang public officials kag indi man nila maintrahan ang protocols nga istrikto nga ginapatuman sang Department of Health kaangay lamang sa releasing sang swab test result.
